Alfred Hugenberg

Alfred Hugenberg
Alfred Hugenberg in 1933
Minister vir Ekonomie, Landbou en Voeding
Ampstermyn 30 Januarie 1933 – 29 Junie 1933
Eerste minister	Adolf Hitler
Voorafgegaan deur	Hermann Warmbold (Ekonomie) Magnus von Braun (Voeding)
Opgevolg deur	Hjalmar Schacht (Ekonomie) Richard Walther Darré (Voeding)
Persoonlike besonderhede
Gebore	19 Junie 1865 Hannover, Koninkryk Hannover
Sterf	12 Maart 1951 (op 85) Kükenbruch, Wes-Duitsland
Politieke party	Duits-Nasionale Volksparty
Eggenoot/-note	Gertrud Adickes

Alfred Ernst Christian Alexander Hugenberg (* 19 Junie 1865 in Hannover; † 12 Maart 1951 in Kükenbruch) was 'n Duitse entrepreneur met belange in die mynbou-, krygstuig- en mediabedryf en politikus van die verregse Duits-Nasionale Volksparty (DNVP).

In die eerste maande ná die Nasionaalsosialistiese magsoorname in Januarie 1933 het hy die amp van minister vir ekonomie, landbou en voeding in die eerste kabinet van Adolf Hitler beklee. Hugenberg word as die beduidendste burgerlike wegbereider van die Nasionaalsosialistiese beweging beskou. Met sy mediaonderneming het hy sowat die helfte van die Duitse pers beheer en deur middel van nasionalistiese en antisemitiese propaganda grootliks bygedra tot die opkoms en groei van verregse partye in die Weimarrepubliek.